.png)
ಪವಿತ್ರ್ ಅತ್ಮ್ಯಾ ವಾಡ್ಯಾಗಾರಾಂ ಮೇಯಾಚಾ ಎಕಾ ತಾರ್ಕೆರ್ ಕೆಮ್ಮಣ್ಣು ಕುದ್ರ್ಯಾಕ್ ಪಿಕ್ನಿಕಾಕ್ ಗೆಲ್ಯಾಂವ್. ಹ್ಯಾ ಪಿಕ್ನಿಕಾಂತ್ ವಾಡ್ಯಾಚಾ 52 ಜಣಾಂ ಸಾಂಗಾತಾ ಫಿರ್ಗಜೆಚೆ ಸಹಾಯಕ್ ವಿಗಾರ್ ಬಾಪ್ ನವೀನ್ ಪಿಂಟೊ ಹಾಜರ್ ಆಸ್‍ಲ್ಲೆ. ಸಕಾಳಿಂ 7.30 ವೊರಾರ್ ಲಾನ್‍ಶ್ಯಾ ಮಾಗ್ಣ್ಯಾ ಉಪ್ರಾಂತ್ ಬಸ್ಸಾರ್ ಆಮ್ಚೆಂ ಪಯ್ಣ್ ಆರಂಭ್ ಜಾಲೆಂ. ಪದಾಂ, ನಾಚ್, ಬಂಡಿ ಆನಿಂ ಜೋಕ್ಸಾ ಮದೆಂ ಸುರತ್ಕಲ್ ಫಿರ್ಗಜೆಚಾ ಹೊಲಾಂತ್ ಕಾಫಿ ಫಳಾರ್ ಘೆವ್ನ್, ಉದ್ಯಾವರಾಂತ್ ಅದ್ಲ್ಯಾ ವರ್ಸಾ ಉಗ್ತಾವಣ್ ಜಾಲ್ಲ್ಯಾ ನವ್ಯಾ ಫಿರ್ಗಜೆಕ್ ಭೆಟ್ ದೀವ್ನ್, ಕೆಮ್ಮಣ್ ಥಾವ್ನ್ನ್ 3 ಬೊಟಿಂಚೆರ್ ಅರ್ದ್ಯಾ ವೊರಾಚೆಂ ಪಯ್ಣ್ ಕರ್ನ್ ಸುಮಾರ್ ಇಕ್ರಾ ವೊರಾರ್ ಆಮಿಂ ಕುದ್ರ್ಯಾಕ್ ಪಾವ್ಲ್ಯಾಂವ್.
ಪಾವ್‍ಲ್ಲೆಂಚ್ ಭುರ್ಗಿಂ ಸಗ್ಳಿಂ ಥಂಯ್ ಆಸ್‍ಲ್ಲಾ ಖೆಳಾ ವಸ್ತುಂ ಖುಶಿನ್ ದಾವ್ಲಿಂ. ಥೊಡೊ ವೇಳ್ ವಿರಾಮ್ ಘೆವ್ನ್ ಜಾತಚ್ಚ್, ಸಕ್ಡಾಂಕ್ ಸಾಂಗಾತಾ ಜಮವ್ನ್, ವೆಲ್ಲ್ಯೊ ಖಾಣಾಚ್ಯೊ ವೊಸ್ತು ಆನಿಂ ಥಂಡ್ ಪಿವನ್ ವಾಂಟ್ಲೆಂ. ಹಾಚಾ ಉಪ್ರಾಂತ್ 4 ಪಂಗಡ್ ಕರ್ನ್ ಥೊಡೆ ಖೆಳ್ ಚಲವ್ನ್ ವೆಲೆ. ಖೆಳ್ ಅಖೇರ್ ಜಾಂವ್ಚೆ ಆದಿಂಚ್ಚ್ ಭುರ್ಗಿಂ ನಪಂಯ್ಸ್ ಜಾಲ್ಲಿಂ. ಚೆರ್ಕೆ ಭುರ್ಗೆ ಕ್ರಿಕೆಟ್ ಖೆಳ್ಚ್ಯಾ ಗಮ್ಮತಾಯೆರ್ ಆಸ್ಲ್ಯಾರ್, ಚಲಿಯೊ ಸೆಲ್ಫಿ ಕಾಡ್ಚ್ಯಾಂತ್ ಮಗ್ನ್ ಆಸ್ಲಿಂ, ಪ್ರಾಯ್ವಂತಾ ಇಂಡ್ಲ್ಯಾರ್ ಬೊಸೊನ್ ವಿರಾಮ್ ಕರ್ನ್ ಆಸ್ತಾನಾಂ ಉರ್ಲಿ ಸುಖ್ ದುಖ್ ಉಲಂವ್ಚ್ಯಾಂತ್ ಅಪ್ರೂಪ್ ಮೆಳ್ಚೊ ಅವ್ಕಾಸ್ ಘಳ್ಸುಂಕ್ ಲಾಗ್ಲಿಂ. ಕುದ್ರ್ಯಾಚಾ ಗೋಡ್ ಸುರೆಚಿ ರೂಚ್ ಚಾಕುನ್, ರುಚಿಕ್ ಚಿಕನ್ ಬಿರಿಯಾನಿಚಾ ಜೆವ್ಣಾ ಸವೆಂ ಸಕ್ಡಾಂ ದಾದೊಶಿ ಜಾಲಿಂ.
ಜೆವ್ಣಾ ಉಪ್ರಾಂತ್ ಹೌಸಿ ಹೌಸಿ ಖೆಳ್ ಚಲವ್ನ್ ವೆಲೊ. ಖೆಳಾಂತ್ ಜಿಕ್ಲೆಲ್ಯಾಂಕ್ ಸಹಾಯಕ್ ವಿಗಾರ್ ಬಾಪಾನಿಂ ತಶೆಂಚ್ ಗುರ್ಕಾರಾನ್ ಇನಾಮಾಂ ವಾಂಟ್ಲಿಂ. ಹೆಂ ಜಾತಚ್ಚ್ ಉದ್ಕಾಂತ್ ಖೆಳ್ಚ್ಯಾಕ್ ರಾಕೊನ್ ರಾವ್‍ಲ್ಲಿಂ ಭುರ್ಗಿಂ, ವಡಾಂ ಸುಮಾರ್ ಏಕ್ ಘಂಟ್ಯಾಚೊ ವೇಳ್ ದಾದೊಶಿ ಉದ್ಕಾಂತ್ ಖೆಳ್ಳಿಂ. ಚಾ ಪಿಯೆವ್ನ್ 5.30 ವೊರಾರ್ ಪಾಟಿಂ ಭಾಯ್ರ್ ಸರ್ಲ್ಯಾಂವ್. ಸಕಾಳಿಂ ಬರಿಚ್ಚ್ ಪದಾಂ, ನಾಚಾ ಸವೆಂ ಪಾಟಿಂ ಪಯ್ಣ್ ಆರಂಭ್ ಜಾಲೆಂ. 7 ವೊರಾಂಚೆರ್ ಸಕ್ಡಾಂನಿ ಸಾಂಗಾತಾ ಮೆಳೊನ್ ಮರಿಯೆ ಮಾಯೆಕ್ ತೇರ್ಸ್ ಭೆಟಯ್ಲೊ.
ಶ್ರೀಮತಿ ನ್ಯಾನ್ಸಿ ಡಿ’ಸೋಜನ್ ಸಗ್ಳೊ ದೀಸ್ ವಾಡ್ಯಾಗಾರಾಂ ಸಾಂಗಾತಾ ಖರ್ಚುನ್ ಪಿಕ್ನಿಕೆಚೊ ಸಂತೊಸ್ ದೊಡ್ತೊ ಕೆಲ್ಲ್ಯಾ ಸಹಾಯಕ್ ವಿಗಾರ್ ಬಾಪಾಂಚೊ ಉಪ್ಕಾರ್ ಭಾವುಡ್ಲೊ. ಸರ್ವ್ ವಾಡ್ಯಾಗಾರಾಂ ತರ್ಫೆನ್ ಶ್ರೀಮತಿ ಕಾರ್ಮಿಣ್ ಡಾಯಸನ್ ಪಿಕ್ನಿಕೆ ವಿಷ್ಯಾಂತ್ ಹೊಗ್ಳಿಕ್ ಉಚಾರ್ಲಿ. ಫಾದರ್ ನವೀನನ್ ಪಿಕ್ನಿಕ್ ಯಶಸ್ವಿ ಜಾಂವ್ಚ್ಯಾಂತ್ ವಾವುರ್ಲೆಲ್ಯಾ ಸಕ್ಡಾಂಕ್ ಎಕಾ ಗಿತಾ ಮಾರಿಫತ್ ಧನ್ಯವಾದ್ ಪಾಟಯ್ಲೆಂ. ಸಕ್ಡಾಂ ಸಂತುಷ್ಟ್ ಜಾವ್ನ್ ಸುಮಾರ್ 8 ವೊರಾರ್ ತಾಂಚಾ ತಾಂಚಾ ಘರಾ ಪಾಟಿಂ ಪಾವ್ಲ್ಯಾಂವ್.
