.png)
Nov 5, 2016: ವಾಲೆನ್ಸಿಯಾ ಫಿರ್ಗಜೆಚ್ಯಾ ಪಿ.ಯು.ಸಿ. ತಶೆಂ ಧಾವ್ಯಾ ಕ್ಲಾಸಿಚ್ಯಾ ಒಟ್ಟುಕ್ 102 ಭುಗ್ರ್ಯಾಂಕ್ ಅ| ಮಾ| ದೊ| ಲುವಿಸ್ ಪಾವ್ಲ್ ಸೊಜ್ ಆಮ್ಚ್ಯಾಗೊವ್ಳಿ ಬಾಪಾನ್ ನವೆಂಬರ್ 5 ತಾರಿಕೆರ್ ಸನ್ವಾರಾ ಸಾಂಜೆಚ್ಯಾ 5.30 ವರಾಚ್ಯಾ ಮಿಸಾಚೆರ್‍ ಕ್ರಿಜ್ಮಾಚೊ ಸಾಕ್ರಾಮೆಂತ್ ದಿಲೊ.
ಪಯ್ಲೆ ಸುವಾತೆರ್‍ ಯಾಜಕಾಂನಿ, ಭುಗ್ರ್ಯಾಂನಿ, ವ್ಹಡಿಲಾಂನಿ ಗೊವ್ಳಿ ಬಾಪಾಕ್ ಬರೊ ಯೆವ್ಕಾರ್ ದಿಲೊ. ವಿಗಾರ್ ಬಾಪಾಂನಿ ಝೆಲೊ ಘಾಲ್ನ್ ಸ್ವಾಗತ್ ದಿಲೊ ತರ್‍ ಕ್ರಿಜ್ಮಾಚ್ಯಾ ಭುಗ್ರ್ಯಾಂ ಪಯ್ಕಿಂ ಕ್ರಿಸ್ಟನ್ ಡಿ’ಕ್ರೂಜಾನ್ ಫುಲಾಂಚೊ ತುರೊ ದೀವ್ನ್ ಸ್ವಾಗತ್ ಕೆಲೊ. ಉಪ್ರಾಂತ್ ಗೊವ್ಳಿ ಬಾಪಾನಿ ಭುಗ್ರ್ಯಾಂಲಾಗಿಂ ಭಾವಾರ್ಥಾಕ್‍ ತಶೆಂ ಕ್ರಿಜ್ಮಾಚ್ಯಾ ಸಾಕ್ರಾಮೆಂತಾಕ್ ಲಗ್ತಿ ಜಾಲ್ಲಿಂ ಸವಲಾಂ ವಿಚಾರ್ಲಿಂ. ಉಪ್ರಾಂತ್ ಮಿಸಾಚೆಂ ಬಲಿದಾನ್ ಆನಿ ಥಿರಾವ್ಣೆಚೊ ಸಂಸ್ಕಾರ್ ದಿಲೊ.
ಮಿಸಾ ಉಪ್ರಾಂತ್ ಗೊವ್ಳಿ ಬಾಪಾಕ್ 75 ವರ್ಸಾಂಚ್ಯಾ ಜಿವಿತಾಚ್ಯಾ ದೆಣ್ಯಾಂ ಖಾತಿರ್, 20 ವರ್ಸಾಂ ಮಂಗ್ಳುರ್ಚೊ ಗೊವ್ಳಿ ಜಾಂವ್ಚೆಂ ಭಾಗ್ ಮೆಳ್‍ಲ್ಲ್ಯಾ ಖಾತಿರ್ ಆನಿ 50 ವರ್ಸಾಂಚ್ಯಾ ಯಾಜಕೀ ಜಿವಿತಾಚಿ ಘಡಿ ಉಗ್ಡಾಸಾಕ್ ಹಾಡ್ನ್ ಸನ್ಮಾನ್ ಕೆಲೊ. ಫಿರ್ಗಜಿಚೊ ಕಾರ್ಯದರ್ಶಿ ಶ್ರೀಮಾನ್ ಲೆಸ್ಲಿ ಸೊಜ್ ಹಾಣೆಂ ಮಾನ್ ಪತ್ರ್ ವಾಚುನ್‍ ಅರ್ಪಿಲೆಂ. ವಿಗಾರ್ ಬಾಪಾನಿ ಶೋಲ್ ಪಾಂಗ್ರುನ್ ಮಾನ್ ಅರ್ಪಿಲೊ ಆನಿ ಸಹಾಯಕ್ ವಿಗಾರಾನ್‍ ಝೆಲೊ ಅರ್ಪಿಲೊ. ನಿಮಾಣೆಂ ಮಾನೆಸ್ತ್ ಲುವಿ ಜೆ. ಪಿಂಟೊಚ್ಯಾ ಕುಮ್ಕೆನ್ ಸರ್ವ್ ಭುಗ್ರ್ಯಾಂಕ್ ಪವಿತ್ರ್ ಪುಸ್ತಕ್ ವಾಂಟ್ಲೊ.
