Parish News

2018 ಜೂನಾಚ್ಯಾ 23 ತಾರ್ಕೆರ್ ಸನ್ವಾರಾ ನಿತ್ಯಾಧರ್ ಮಾಯೆಚ್ಯಾ ಪರ್ಬೆ ದಿಸಾ ಸಾಂಜೆಚ್ಯಾ ಮಿಸಾ ವೆಳಾರ್ ಪಾತ್ರೊನಾಚೆ ವರಸ್ ಉದ್ಘಾಟನ್ ಕೆಲೆಂ. ಸುರ್ವೆರ್ ಯಾಜಾಕ್ ಆನಿ ಗೊವ್ಳಿಕ್ ಮಂಡಳಿಚ್ಯಾ ಸಾಂದ್ಯಾಂನಿ ಮೆಳುನ್ ಪುಶ್ರ್ಯಾಂವಾರ್ ಯೇವ್ನ್ ನಿತ್ಯಾಧರ್ ಮಾಯೆಕ್ ಫುಲ್ ಅರ್ಪುನ್ ಮಾನ್ ಕೆಲೊ. ಉಪ್ರಾಂತ್ ವಿಗಾರ್ ಬಾಪಾಂನಿ ಪಾತ್ರೊನಾಚೊ ಲೋಗೊ ಉಗ್ತಾವಣ್ ಕರುನ್ ಪಾತ್ರೊನಾಚ್ಯಾ ಮಾನಾಕ್ ಹೆಂ ವರಸ್ ಸಮರ್ಪಿಲೆ. ಆಮ್ಚೊ ಪಾತ್ರೊನ್ ಸಾಂ ವಿಶೆಂತ್ ಫೆರೆರ್ ಮರೊನ್ 600 ವರ್ಸಾಂ ಜಾಲ್ಲ್ಯಾ ಸಂದರ್ಭಾರ್ ಹೆಂ ವರಸ್ ತಾಂಕಾಂ ಭೆಟಯ್ಲಾ. ಉಪ್ರಾಂತ್ ತಾಂಣಿಂ ಪ್ರಧಾನ್ ಯಾಜಕ್ ಜಾವ್ನ್ ಮಿಸಾಚೆ ಬಲಿದಾನ್ ಭೆಟಯ್ಲೆಂ. ಬಾಪ್ ಅರುಣ್ ಲೋಬೊ ಹಾಂಣಿಂ ದೆವಾಚ್ಯಾ ಉತ್ರಾಂ ವಯ್ರ್ ಪ್ರಸಂಗ್ ದಿಲೊ ಆನಿ ಬಾಪ್ ಜೋಸ್ವಿನ್ ಪ್ರವೀಣ್ ಡಿಸೋಜ ಹಾಂಣಿ ಮಿಸಾಚಿ ಸಹ ಭೆಟವ್ಣಿ ಕೆಲಿ. ಮಿಸಾಚ್ಯಾ ಅಖ್ರೇಕ್ ಸಗ್ಳ್ಯಾ ವರ್ಸಾಚಿ ಕಾರ್ಯಾವಳೆಚಿ ಪಟ್ಟಿ ಸಾಂಕೇತಿಕ್ ರಿತಿನ್ ಗೊವ್ಳಿಕ್ ಪರಿಷಧೆಚ್ಯಾ ಸಮಿತಿಚ್ಯಾ ಸಾಂದ್ಯಾಂಕ್ ಹಸ್ತಾಂತರ್ ಕೆಲಿ.